4th ANNIVERSARY

4th ANNIVERSARY

( SHORT STORY ) 

By - Robert Pachuau 🌹🌹

16may, 11:30pm a ka whatsapp message dawn chuan min thawng kher mai. 

"hi babe im positive i just get my test result" tih te hi lo nia. Ni danga ka lo namnul ve thin tehreng nen, mitam takin an kaia a vanduai bik nuai telin an lo thihpui tawh hri a kai ve tih ka hriat meuh chuan kai ve ang mai khan ka lo buai nghal chawng maia. Eng dang sawilo chuan ka call nghal taa, an hna avanga chhuak lo theilo a nih zia leh a that leh mai a rin thu te min lo hrilha. Symptom a neih loh thu leh in lama a in enkawl theih mai tur thute min lo hrilh zung zung bawka. Tha taka in enkawla hriselna ngai pawimawh tura in chahin kan inngaih ziate, kut invawn phaka awm dun leh kan chakziate, kan inhmangaih thu te kan inhrilh mawlh mawlh hnuah kan in mangtha taa. 

Kum 5 liamta, 2016 February ni 8 zan dar 9  velah kum 2 chuang ngawt ka lo awm tawhna leh ka lo inhlawh ve tauh tauhna hmun kolkata khawpui chu kalsana dinhmun tha zawk leh hlawk zawk beiseina avangin Mumbai khawpui pan turin ka chhuak taa. Hemi tum hian ka hmanhmawh lo bawka ka hna thar zawm hmain kar hnih chuang hun ka neih tho avangin thlawhna a kal tih vel kha ka ngaihtuah lemloa, train ticket tlawm deuhin ka book lawk bawk nen  Howrah Station lam pan chuan ambasador Car taxi eng ngei mai chuan kan awmna south city atang chuan kan tlan phei taa. A kum tel kan lo talna a nih tawh avangin awmnghet zawk tura hmun dang han pansan daih tur chu lung a leng veng veng mai. City of Joy an loh tih ang ngeiin thiante nena hun hlimawm leh nuam tak tak kan lo hman ho thin te rilruah a rawn lang zut zuta, mi rawn thlahtu ka thianpa ber ka roommate ni bawk Sawma pawn min ngai ve hle tih hriat tak hian thu sawi awn deuh hian min ngheng bawka. A ni hi mi harh ngang a nih avang hian a lunglen ve pawh ka ring vakloa mahse a lunglen tur thu leh a maha haw phei a in ruak hiaia luh a huphurh thu min hrilh ve ngei a, ka khawngaih ang reng viau mai.

Reivakloah chuan kan thleng phei ve maia Howrah Rel Station ah chuan mihring hi an lo tam khawp maia, Sawma phei chuan tu nu englo atanga chhuak zozai chu nimaw an ti ngeia kan nuih tak vak kha. CSMT Kolkata to Mumbai service ah chuan ka seat tur vel zawng chuan kan buai khawp maia, rel tih takah a lo sei nasa mai sia! A block tetea zawn ngai nen kan buai rei phian. Zan dar 10:30 ah chuan chhuak turin rel pawh chu a ri ta ruai ruai mai le, Sawma pawh chuan min ngai hle tih hriat tak hian rel tawlh hret hret thleng chu ka seatah lo thu vein a tlan chak hmain hreh hmel takin min chhuk san taa. Ka ngai dawn hle mai che Sawma. Kan in mangtha taa.

 

Lungleng ru tak chuan ka seatah chuan thuin ngaihtuahnaah ka chhuahsan mek Kolkata a kan hun hman dan te chhui kir neuh neuhin a nuihzatthlak lai ber kher ka ngaihtuah chhuak tlat peka, kan broke lutuk coconut tui in chak si khan hindu ho pathian bula mi kan lo laa kan in a, min hauh hrep te ka hrechhuaka. Hindu ho chuan kawngsirah an sakhuana thil shiv ling an tih mai bulah coins leh eitur vel an dah teuh thina, Sawma phei kha chuan bus/metro fare tur tiin coins kha a lo chhar thin chu niin, hahthlak thin..zan a lo reia mut a rawn chhuak tan ta, mutna tur siamin kan buai nak nak a ka bulah hian bengoli nula leh tleirawl an chuang vea bengoli ram tih takah buaina tawn palhin tiin ka be tha viaua an felin an polite viau mai. Nulate an nia tiin an duhnaa mu turin ka tia a chung berah dawhsan ah chuan ka mu taa. Ka lo muhil tui viau a ni ang ka harh chuan train station lian vaklo  CHAKRAKHARPUR ah hian kan lo dinga. Thil eitur leiin kan chhuak sap sapa, minute 5 vel lek a din avangin kan hmanhmawh tlang hle. Ka chuanpui nula Nandita chu tlangval pakhat nen hmanhmawh takin an lo pheia, hmanhmawh tura hui pahin ka lo nghak hlawma kan lut fel tih leh rel chu a tlan a rual nghal deuh maia. A thianpa emaw ka tih chu tunge i thianpa hi? Khawia kal tur nge tiin ka lo zawta, a thianpa awzawng a lo nilo an rawn kal dun satliah chu niin. A thianpa a nih loh thu sawi pahin tlangvala chu an en a, a hmingte sawiin a kalna tur vel a zawt paha,tlangval chuan  Mumbai kal tur a nih thu leh a hming Eric tia sawi pah chuan thian dunah min ngai a ni ang chu mi rawn chibai nghala, ka hmingte hrilhin kan thu hoa kan ti ti nghal mawlh mawlha. 

Kan thianpa thar hi Indian ni mahse a nu hi Texas lam mi daih a lo nia, a nu leh a pa hi an in then tawha,  sap turah ka lo ngaia kei lah pek chuan. A mit meng a fiah kak maia, taksa inphut mawi tawk, thau ni hranlo sa tha tak a ni. Sap kan tih anga vun var ngo duak chu a niloa, a vun rawng chu a mawi khawp mai. A sen paw deuh thuk ni berin ka hria.Kum 28 bawr vel ,Palian mawi tawk tak,  5'11" vel chu niin a lang.6feet ka tlinglo deuh a ti bawka. A ha var rual zet a nuih zawnga lang siau chu ka lo hmu hma ang reng. Ha var deuh hi a mawi bawka.A sam dum tha tak leh a bianghmul dum tha tak ni hnih thum vel shave tawh loh chuan a ti lang pa hle. Mumbaia hnathawk a lo nia, Hiranandni Companya engineer hnathawk mek a lo nia, a felin a polite khawp mai. Kan ti ti mawlh mawlha Nanditai eitur lei Snacks vel kan eiho lai chuan kan thianpa Eric-a chu a luak deuh tepa, vai tih takah Nanditai lah chu aw sin zetin a lo tre vak maia min ti hlauthawng angreng.Tinge tinge tiin kan buai nuai nuai maia "food allergic i nei emi?" tia ka han zawh lahin a hriat bik loh thuin min chhanga, wash basinah a va uak tuarh tuarh bawka kei lahin ka umzui zel, a luak bawk, a uak bawk, a pum a nat thu a sawi leh! Nanditai hlauthawng hmel mawlh kha nuihzatthlak, a eyebrows hi a ngil vekin facial expression pawh a thiam narawh e,  Savdhan India hi ni ringawt. Kan thil eina kawr ka han en a nuts atanga siam a lo nia, midang zawng engtin mah awmloa a ni khatia a awm vak nachhan tur kha thil dang a awmlo. Nuts lam a ei theilo a nih ka ring nghala. Damdawi lak maina tur awm nghallo. Tui in teuh turin kan ti ta ringawta, thuawih deuh chuan a in deuh sek ve ta maia. A zia deuh ni turah kan ngai. Khua a var chiang tawh tih velah hian station pakhatah hian kan thlenga Eric-a chu a chau deuh a ni ang, Kan thutna opposite seat chung berah chuan a muhil tui khawp maia. Pawnah Duty shed ah chuan damdawi vel an kawl leh kawl loh zawtin ka va kala, pharmacy min kawhhmuh zawka. Pharmacist hian alo nghak hlauha damdawi vel ka lei hnu chuan ka let leha, ka thlen pawh chuan Erica chu a lo la mua.

Theih ang anga kan buaipuia damdawite kan eitir hnu chuan a pum a nat tawh lemloh thu a sawia. A lawm khawp mai Nanditai te unau pawh an lawm nasa, Nanditai hlauh ber chu lo thi se jail ah ka tang dawn tih lam daih kha lo ngaihtuah chu niin, a sawichhuah laia kan nuih nasat zia kha, bengoli thluak tih takah a ukil tur pawh a lo biak lawk hman nia ka rin ni. Erica hian harsatna a tawha ka buaipui atang kha chuan min ngaina viauin ka hria. Ei tur neuh neuh hi min lo lam kep reng maia, a ngailo ka tih pawn min lo lei kep leh thin. Mifel tak, thian te ngaihsak mi tak a nih ka ring nghala.Thian thar ka chhar ho nen chuan kan hlim tlang viau a ni ang, kolkata lam pawh ngaituah let em em loin a tuk leh zing dar 4 velah Thane station kan thlenga, Nanditai te unau chhuk turin an in siam a, mizo tlangval tih takah an thawmhnawte thiar puiin kan pui lawp lawpa, Erica nen chuan kan thiar chhuah puia train kawngka atang chuan kan bye bye a rawn bye bye ve lauh lauhin kan thlir renga. A hnu rei vakloah kan chhukna tur station Lokmanyatik Terminus chu kan thlenga, Erica hi chu ni hnih khat chama zin lawk a nih avangin bag pakhat a khai leuh leuh a, kei ve thung chu kum 2 chuang khawsak pui thawmhnaw chhawm tih takah luggage lian tawk tawk 2 nen air bag nen ka bawr lutuk kha a manganthlak. Erica chuan khawi khawi nge ka thawmhnaw min zawtin min lo dah chhuahpui nghal zung zunga. Erica hi Dadar lama awm a nia, kei lah Andheri lama kal tur ka ni sia, a ni chuan Uber kan la anga ka va drop ang che a ka phei leh mai ang a ti deuh tlata mahnia chawi aiin a tlawm deuh ang chu ti rilruin awle tiin Uber chu kan ko taa. Riltam takin ka awmna tur lam Andheri lam chu kan pan taa. Traffic a la tawt lemlo bawka kan tlan reilo viau, manipur lam mi ka roommate tur chu ka phone lawka, min lo chan tur thu a sawia. Erica chuan an hnathawhna chungchang te sawi luamin nakinah remchangah a ina leng tur ten min sawm zuia, a allergy kan buaipui avanga a lawmziate sawi pahin phone no. te kan in pea, airport road atanga hla vakloah chuan ka thianpa Jitena chu alo dinga, thawmhnaw vel min unload pui sap sap a, kan unload zawh chuan Erica chuan ka rawn call dawn nia tiin kan in thlah taa.

Mumbai chu a lo lum bik khawp mai Kolkata ah kha chuan thlasik a ni tih kha a hriat theih tala. A lum up up ni ber. Jitena ka roommate tur a nia Imphal mi Kolkata lam atanga inkawm tawh kan nia a mah hi Indigo company hnuaia Airport a hnathawk a ni a, a felin a nui duh barh barh thin thle. A ni hian thil tam tak min ngaihtuah puia sum leh pai tha leh zung sengin ka tan hian thian tha, unaupa tha hi a ni tak zet. Hei vang hian Mizo thian nei nual mah ila a ni min duhsakna vang hian a inluah hi ka va fin ta a ni. Ka thawmhnaw vel ka indah fela thlan tla hluamin fan hnuaiah ka thu chu ka muhil deuh roh hi lo nia, ka mumangah Eric a kha ka lo hmu zui Hospital ICU ah ventilator nen na tak hmelpua damloin ka lo hmu chu ka tal vaka ka harh hlawl maia. Mak ka ti ngei mai! Ka thlan hian min lo bual huh deuh vek bawka. Ka in tleuh fai zawh chuan thianpa nghari rawt rimtui deuh chuan riltam a tu zual ni ang kan chaw lak a tha dun khawp mai. Ericka chuan a rawn whatsapp chu niin a thlen tawh thu leh a chauh rawih thu a message ka hmuh rualin ka mumang mak deuh kha ka mitthlaah lo lang nghala, ka hmuh dan vel ka hrilh pah chuan nuts vel i huat kha fimkhur la ka ti zuia. Hemi ni atang hian whatsapp velah hian kan inbe zeuh zeuh a, mahni buai buaiin a thla tel chu a lo ral ve maia. 

Hnate kan thawka hunte a rawn inher ve zela nikhat chu inah ka awma games ka khelh lai takin Eric a chuan mi rawn phone hlawl maia. Heng lai hunah hi chuan Traina kan thlalak hote kha ka en ve zeuh zeuha tlangval hmeltha tak a ni tih chu hre mah ila va veina kha ka nei lemlo, chuan straight tur khan ka ngai bawka, kan in text pawn tiang lam hawia inbiak kha kan nei ngailo hrim hrim bawk. Hna chungchang leh thil ho te te kan sawi kha ni mai a. Kan awmna piah lawk a metro station atangin min lo call niin, ka off day a lo ni bawk nen kan ina leng tur chuan ka sawma. A nuam chu ka ti chiahlo kan awmna kha a building chu nuam, mahse a ruak lutuka. Khum kan neiloa, Sitting room leh kitchen inkawpah thutna sofa chu 1 a awm ve a. Bed roomah mattress kan phah topa. A hnawk em em zui..phaia mipa inluah chu fel thlap a har thin kha. Zial kan zu lo hlauh kan inluah a rimchheloa kan vannei zawk. A pawilo ka hman remchang alawm a tih takah chuan in chu kan ti fel thuak thuaka, mizo chu nise ka tifel kherlo ang. Hnam dangte an ni sia Mizo min hmu mawilo lutuk ange tih ka hlau ve deuha. Kan society gate ah chuan tshirt a zak cheh zau nen ngei khan boxer nen ka lo changa, minute 3 vel ka nghah hnu chuan tlangval piannalh tak, smart tak, kamis senduk leh kekawr var lam ha rawn phei hi ka hmua Ericka nih ka ring lemloa kan inhmuh lai khan kekawrbul leh tshirt nen choha ka hmuh avang khan  smart deuh khan hmuh ka lo beisei lem loa,  Ka bul a rawn thlen chuan " hi" tih paha nui var var chungin a kut a rawn dawha, ka bah deuh nuaihin ka hria kha mi tum impression kha chu. Ka chhanglet a chibai pah chuan a smart lutuk a ka lo hai thu te kha ka hrilh vel tain ka hria. Inah chuan kan chhoa, kan room vel te kawhhmuh pahin kan awm dan tlangpui kan sawi vea, mizoah chuan ka ti ngai lemloa, sap deuh roh an nia, an tih dan zulzuia han welcome te hi tha tih thuah. Hemi ni hi chu traina uak vak vak hmel, duh anga intihfaina tur tui awm lohnaa a hmel nen kha chuan a in ang tawhlo kher mai. Traina vai tam tak zinga vaisap pakhat hmel pangngai tak kan bula chuang ve ni maia ka lo ngaih kha a nilo tlat! A lo hmeltha hle nih hi tih ka hrechhuak ta. Juice te kan ina kan ti ti bawrh bawrh a, min biak dan te, a cheziate, a thusawi duh zawngte, mi changkang tak chu a nih ngei hi ka ti rilrua, a proffesional khawp mai engkimah. A personality a thaa, communication skills, impression a nei tha em em bawka, a bula awm a nuamin a va zamawm si em. Mahni tawka induh ve tak, zah lohna tur huna zaklo thei inti ve thin tak ka ni nain ka mita chiang taka a mitmeng fiah sen uk deuh khakin min han en kha chuan ka zam thin chu ni ber. Mahse kha tluka hmuhnawm kha a awm silo. Lai hmel put loh hram ka tum lai hmel kha ka hmu chak letling zawk. Tlai lamah Hanging garden lama leng turin min sawm zuia, vawikhat hmanhmawh zeta kan kal bak ka la kalloa kal leh ka chak thu ka lo sawia. A thil tih ber a tih fel tawh avangin chumi ni chu a lo hman viau chu lo niin. Leng tur chuan kan relthlu taa.Mumbai lam hi India ramah chuan ni tlak harna pawl a nih avangin tlai lam hi a tlai bik thin khawp mai.  Erica a smart em avang chuan formal deuh hleka inchei vein tlai dar 4 vel chuan kan chhuak taa, Erica hi inngaitlawm thiam tak a lo nia, car nalh tak nei mahse local train leh auto a chuan a hreh lemloa, thil tui ber ber ei thei mahse kawngsira vada poa pawh a ei ve thei mai bawka. Mi fel tak chu a ni ve hrim hrim, humble deuh hi ka ngaina bawk. Local train a chuan deuh fe a ngaih avangin min veng hneh hle naupang hruai an hnunga kan dawm angreng hian min dawm tluan a ni ber. Park kan va thleng chu nula tlangval, naupang nen nu leh pa an lo tam leh kher mai. 

Thil ka hmuh tir ang che tiin min kai hlawk hlawka, thlang lam pang mi tlemna lamah chuan hmun nuam leh fal deuh khaw hawi nuam zetah hian min hruaia, ka han hawi chuh! Mumbai khawpui mawina ber tih theih hial tuifinriat kama khawpui mawi em em, building sang leh mawi tak tak ding phei put chu a hmuhnawm kher mai. An naupan laiin he park bul lawkah hian an awma, an kal thin thute min hrilhin Kan dinna lai chu a hmun ngainat lai ber a nih thu te, an chhungkaw chanchinte, helai park a ngainat thin zia te a sawi zuia, Kan dinna chu tuipui kam tlangsanga awm a ni bawka a thaw nuamin tlai lam boruak chu a nuam khawp mai. Ka bula ding hian a lo zir em bawka, a thusawi paha a heh an liak zeuh thinte kha kum nga liam hnu pawh hian a mawi ka la tiin ka la mitthla fo thin. Ni e, i ngainat em em Malabar hill hi keipawn ka hmun ngainat ber te zingah ka chhiar lo theilo, khami ni atang khan. Dar 7 velah kan haw taa. Tlai lam khaw nawm lai a ni bawka Kein thui tawk kan kala a hmel atang khan min ning vak biklo tih kha chu ngaihbel vang nge ka hre vein ka hria mahse, thian tha satliah ah min ngai turah ka ngai deuh sia. Anyway ka tan pawh thian tha tak i ni e Eric.

Eng em em in hrilh loin hlim tho si hian hetia chhuah dun hi kan nei ta zeuh zeuh a, shopping te, pool te, karoake , beach ah te, kum a lo vei meuh chuan kan lo chhuak dun nasain kan lo inkawm ngeih tawh khawp mai. Heng hun chhung zawng zawng hian thian inkungkaihna bak ang kha kan ti lang ngailo, lo duh tho mah ila kha relationship kha tih chhiatin a awm ka hlauh avangin ka ti lang ngailo. Min sawmnaah hi chuan a tan hian hun kha ka lo ui lemlo a ni ang. Hun inpek hram hram kha kan tum ve ve thin, bialnu deuh roh a neih tuma ka rilru lo nat rikngawt dan te kha. A mak khawp mai, khang hunlai khan amahah khan ka hlim tawk a ni ang thian inkawm pangngai ang pawh khan. Midang ngaihzawng emaw lo va ngaihtuah kha a lang lemlo. Mahni hnathawhna lamah kan lo buai ve bawk nen. Mizo thian ka kawm loh phah bawka min sawisel pawh an awm nual mai. Ka hrethiam lutuk a awm pawh ka ti. Mahse a hunah chuan mizo thil tihah chuan ka tel ve hram hram thin hman hi chuan.

 Ka hriat reng chu Mizo chu kan uan em hi, tlai lam ka hnathawk bang ka haw tur kan thian kawm ve tho pakhat Durtlang mi khi nia, chupa chuan min hmu thut kha ka mawng hi rawn beng nawk pahin a tham deuh zuia khala khala kha tia, kan dinga kan inbe  luam a, rei vak loah a kal sawn zuia. Eric a hian sawi lawk lemloin min lo nghak a, motor atangin min lo hmu reng chu niin, Vawi hnih lai a lo call hman  chu niin. mi rawn phone leh a a dinna min hrilha ka va phei chu a lo thinrim rilru viau chu niin,

"kha pa kha tunge?"

"enge in relationship?"

"khawia awm nge?"  kha ti pung pung ta mai kan thianpa lah khan khatiang rilru an put dawn loh nen bialnu 3 aia tlem a nei ngailo. Ka nuih a za angreng lutuk a, nuih chu ka nui chuangloa, a thinrim tawlh tawlh emaw tih mai turin a awm a Eric a lah, 

"vawihnih ngawt ka call chhan lohna khawpa pawimawh chu tunge? " 

"Enge a ni khan a duh duha Khatia a khawih theih Che?" Kha rawn ti pung pung ta mai. Enge i zawhna awmzia tiin curious takin ka zawt leta, Eng dang mahin min chhanglo, a ngawi renga motor a ti nunga a tlan nghala. Mizote chu kan infiam nasa thina, tiang kha chu thiantha infiamna chikhat ve a nih kha tia rei fe kan inhrilh hnu chuan a lu bu nghut a. Kum khat chuang kan in inkawm tawha khatiang khan ka la hmu ngailo che ka tia. 

"ni e, min hmulo ang" tih chiahin min chhanga, a zawhna min zawh kha nuam a tilo deuh niang, tiin ka ngaihtuaha, keipawn min duh vang a ni ang tiha han bawhzui ngaihna ka hre biklo. Tiang kawngah kha chuan ka lak tlak loh top ni mai. Chak tawkin a tlana New Mumbai lamah kawngpui zau tak ngil em em ah chuan chak tawkin a tlan ta vak vak maia, ka hlau hman khawp mai. Vai ram hmun hla takah ruang chhar ngaiin ka awm ang tih te ka ngaihtuah hman. Rei tak kan tlan hnu chuan building lian zet mai mall tura an sak mek hi kan va thlenga tah chuan min din puia, kan ngawi dun vang vang a, a rawn hawiphei a zawite hian 

"Hei i zawhna chhana chu"

"I love You"

 tih pahin mi rawn kiss zeuha, a tlan chak lutuk rilru la hahdamlo bawk, a thinur au pung pung mak tihna nen kha tiang thil  beisei loh lam daih tawn thut chu engtin chiah nge ka feel kha ka hrethiamlo a first Kiss kha chu, a ni a , niloa , tih ang deuh a ni. Sawi tur engmah ka hrelo a mak lutuk kha tih laia ka awmdan kha, ka harh tha vek tho sia, ka che chang lo ni ber.Ka sana ka zuk en zeuh a, 8:47pm 7th June, 2017 a lo ni a.

Thawk lak pah chuan 

"are you serious" tiin kan zawt leta, a duh ang takin a awm biklo a ni ang, a nervous ve tho chuan ka hria, "  ofcourse" tih chiahin min chhang. Kan ngawi deuh vang vanga ka rilru chuan a pawm nghal thoin ka hria, ka duh zawng takin min hmangaih thu min hrilh kha chuan. Mahse eng situationah pawh chhia leh tha hriatna hman hram hram hi ka duh thina ka inzawt nawn nasa hman khawp mai,

 "Eng tiangin nge min hmangaih "

tiin ka zawt a, hmangaihna hi ni e , sawifiah a lo har a niang. 

"I'm not a perfect man, but i do know love, becouse i'm in love with you"  

ka tan chuan a fiah viau thung. A sawi laia a mitmeng fiah tak leh emotional tih hriat tak, chiang taka ka va hmuh khan a mah hmangaih let turin min sawm nasat zia leh ka thinlungin a pawm zia ka hmu tel bawk. Duat taka inpawma duhthawh taka infawpin hmangaihna awmzia chu a takin kan lantir zui taa. Hemi zan atang hian ka nuna hmun ka luah tir lian ber chu a lo ni taa, a tan pawh nithar hmu leh tura chakna leh beiseina petu ka ni ve bawk. 

Rose par tan tir mawizia chu kan hre vek awm e, Mahse chu aia mawi chu inhmangaih tawnnaah hian a awm thung. Mihringah hian thil duhawm hi a lo tam em tih hi ka hre chhuak. Erica hi mi rilru tha, rilru tluangtlam leh dikna ngaina tak a lo ni ve bawk nen, a kum tel thiantha inkawmngeih tak, inngaina tak kan lo ni tawh bawk nen kan inmil lohna sawi tur hi ka la hrelo. A tho tlai deuh tih lo chu. Lehkhabu chhiar nuam kan ti dun hle bawka, piano play nen, violin a tum thiam em em bawk. A bula ka awm tluka ka hlimna hi midang bulah ka tawng ngailo. Mi tak tak a ni in ka hre thin. A promise tawh a tih loh ka la hreloa, ka tan hian a va hlu tak. Hun a liama, kum a veia, kan duh ang ngeiin kan inkar pawh harsatna tawk neuh neuh thin mah ila a nghet chho zel a. Inrintawnna hian rinawmna a hlawh chhuak a ni ber. Min ring ngam a, ka ring em em bawka, a tana ka tih theih hlu ber chu a tana ka rinawm hi ni ka thin. Rinawmna hi kan ngaihlu hle. Thil hrim hrim proffessional taka kalpui duh mi  nihna hian a ti zahawmin zir chhuah tam tak ka nei bawk. Relationship chungchangah pawh nise, hun remchang hmuha sex hman mai mai te hi relationship tichhe thei thil lian ber te zinga mi a lo nia. Relationship tha nei tura kan in zir nasat zia kha aw...inkawmngeih, ingngaina tura inhriat chian te kha alo va pawimawh em! 

Thinlung inzawm sia inhlat taka awm hi a hrehawm a ni., kan awmna a inhlat angreng sia, a mah hi ni deuh maia engkima thil host tu, ka tan chuan a phur thei viau naiin a hna, a eizawnna, a hun neihte ka thlirpui a ngai vea, ka ngaih em em pawn ngailo anga ka awm luih a ngaih chang a awma, ka ngaih thu ka sawi hi chuan inhmuh ngei ngei a duh thin. "Min ngaih laia i hmuh phakloa awm hi ka duhlo" a ti thin. Mi tihnat kha a hlau thin khawp mai. Thil pangngai taka sawi chhoin hmalam hun te kan sawi ve thina.  A bula awm mai turin min sawma, room hran, engkim a hrang a neih kha kan rel ve phawta, Hetiang deuh nuaih kan nih tawh avang hian 2019 june 7 khan Erica awmna Parel lamah chuan Ka in sawn phei ta a ni. Eric a chhungte hi Pune lama an awm tawh avangin amahin kum 5 dawn a lo awm tawha. Ka roommate Jitena hian engkim min hriatpui ve a gay hi Ka support lo, mahse nang chu ka haw hranlo che, ka thianpa, ka unaupa i ni reng, ka ngai ngawt ang che min ti thin. Ka ngai khawp mai keipawn.

Duh berte nena chen dun chu a hrehawm lem loh. Innei pawh kan ni lemloa thil tak tak buaipui kha a ngaih lohna chin a awm ve bawk. Mahse han awm dun takah chuan neuh neuh a lo awm vea thil ho te ah in thu in kalh changte a awm leh thin. Tlangrampa thinlung ram tih takah han tawpsan daih duh changte lo awm ve thin. Inhauh deuh hi chuan. Erica hi chuan solve hram hram a tum thin, tiang harsatna kan tawh hi chuan. Hmampui rilru nge nge a dang bik deuh thin. Ka nuna harsa ka tih ber chu ngaihdam dil hi ni thin. Erica bula ka awm hnu hian ka inzir chhuak ni berin ka hria , ka dik lohnaah pawh ngaihdam dil ngailo kha tunah chuan ka dang ta daih mai. Dik lohna pawm ngam te hi mi puitling zia a lo ni. 

Inthlahlel takin zan lamah hian sofaah thu dunin movie kan en ziah thina, ka kut hi a vuan pahin he thu hi a sawi thin, 

"i kut ka vawn hian nilenga ka hahna leh stress hi a bo thin" tiin. Khang lai khan a hlut zia ka lo hre thiam tawkloa, a thlamuan thlak zia kha chu ka hria. Amah nghenga Ka awma ka secure zia te kha tunah hian ka hrechiang telh telh. Ka tan ui a nei ngaioa tih hreh pawh a nei ngailo. Mipa na na na chu engemaw changin hanin duat em em thin mahila no taka han awm reng hi a nuamlo tihna hi awm ve thina. Thian tha ingngaina tak ang hi pawn lam lan dan chu a la ni riha. Theih ang angin hun hman dun tam kha kan tum thin. Hunawlah chuan lehkhabu chhiar, piono play tih vel kan uar hle.Ka chhungte hian ka thianpa tih bak khan min hriatpui loa, Erica chhungte pawn a thian turah min ngai. Engemaw changa an rawn tlawh pawn rinhlelh awm tur khan min hmu ngai lemlo bawka. 

Thla 6 dawn kan awmdun hnu chuan chutia thudik tak chhungte bula zep chu Erica chuan thain a hreloa, a chhungte pakhat tal hriattir thain a hriaa, hemi chungchang pawh hi kan sawi dun nasa khawp mai. Ni e, mizo Kristian tlangval, Kohhran leh khawtlang ah pawh theih ang tawka lo inhmang ve thin ka ni a, Ka fel ta viau e tihna phei chu a nilo. chutianga relationship chungchang han dah lang tur meuh chuan ka lo la inringtawkloin ka ngam lo hle maia. Rilru hi a insual nasa thin khawp mai khang hunlai khan. Chhungkua ka thlir tello theiloa, KTP lama ka rawngbawlpui thin te, YMA lama ka thawhpui thinte, Kohhrana ka chhungte rawngbawlna ka thlir tel bawka, ka khawvel zawng zawng chu kalsan tur ang hialin ka indah a ni ber. A awlsam lo khawp mai, mi nawlpuiin an tawn ve ngailoh tur kan harsatna tawh hnem bik zia ngaihtuah te hi a awl riau thin. Erica chu hnampui deuh zawk tih takah a mah a inhre chianga,  Khatiang em em khan a inngaihtuahlo mai thei, a lo inngaihtuah ve maithei bawka. Harsa chu kan ti dun khawp mai. Mahse a ni kalsan nan kha chuan engmah kha chhuanlam tling kha ka hmulo thung. Chu chuan chakna min pe leh thin. Kar hnih chuang rilru siamfel nan khan ka hmang a, a tawpah chuan Erica nu chu hrilh mai thain ka hre taa. Christmas hma dec. 22 zan khan vedio call in Erica nu Pi Christina chu kan hrilh taa, hemi tum baka ka zam nasat kha ka la tawnglo. Pi Christina lah thil chik mi a lo ni bawk, Gay chungchangah chuan harsatna a nei lemloa, a fapa kawppui tur chungchangah chuan a lo fir khawp mai. 

"A tan eng chen nge hun i pek theih ang" 

tih min zawhna kha chhan a va har em! Thil tih a ti tak tak mi an lo ni bawka, tiang em tur kha chuan ka la inpeihlo a ni ang. A hriatpuina duh vanga bia kan nih thu leh kan hmalam hun chu kal dun zel kan tum thua chhangin kan in thlah taa. Phurrit a bo tawh dawn emaw tih laiin ka chhungte rilruah an langlo theilo. Thup theih loh chin leh thuk zawk inlaichinna Erica hian a duh hunah Ka chhungte hi enge ka hrilh anga, engtin nge ka sawi ang tih chuan rilru a kamlo theilo biklo.Chhungte remtihna leh pawmpuina mawlh hi khawvela thil dil hlawhtlin har ber a nih ka ring. Hlim taka awm hram hram erawh ka duh thin. 

Inthen har kan ti ve ve tawh sia kan harsatna in ang lemlo mahse inhrethiam takin hun leh ni kan hmang liam ve zela, tumah hi kan awt bik lemlo kan awm dun hi chuan. 2019 Christmas chu hlim takin thiante ho nen kan hmang ho theia, Erica nen hun puma Christmas kan hman dun theihna avangin ka tan chuan a hlu khawp mai. Tum dangah chuan Fellowship leh Kohhran lamah te ka tel ve thin. Ka nuna harsa ka tih lai ber, balance har ber chu Christianity leh gay life hi a ni. Tawngtai leh Bible chhiar, inkhawm tih te thlah thlam vek a awm hi a harsain thil dik a niin ka hre siloa, tiang Christian festival  a thlen chang hian hrehawm tih rukna riau hi ka nei leh thin.

 Damtein kum thar 2020 Kan han chuangkaia, mahni khawsakna leh hna thil buaiin mi zawng zawng an buai karah chuan kei leh Erica pawh kan buai ve thin khawp mai. Zing dar 6 atanga zan dar 9 thleng inhmuh loh chang te kan nei leh ta zeuh zeuh. Kan buai em em avang hian lunglen hi kan hre lo mai pawha a zia viau. Chutia mahni tawka kan buai em em lai chuan kan ngaihtuah chhin ngai loh leh hisapnaa tel ve miahlo khawvel mihring zawng zawng chawk buaia, ti manganga, ti raltia, ti thlabara, ti taptu tur hri pui mak danglam tak chuan kan awmna khawpui pawh a rawn chim tan mek chu niin. Theih ang anga fimkhur leh in veng chungin kan hnaah chuan kan buai chho ve mawp mawp a. A ni telin chu hripui chuan mumbai khawpui pawh a chim pil zel a, rilru chu hah duh khawp mai khang hunlai khan. Nitin mi chi hrang hrang nena in contact kan lo ni bawk sia rilru nuam khan a awm theih meuh tawh loh. Hmun hrang hrangah positive case thar kha an hmu chhuak ta zut zut mai bawk sia, hriat ngailoh thil a lo ni bawk nen, rilru hi a tawt up up zel. Zan lamah hi chuan awm hahdama thawveng taka hun hman hram hram kha kan duh thin. Hetiang hun harsa leh buaithlaka ka bula awm reng, ka kut vuana min nuih tir thintu Erica hi a hlu telh telhin ka hre thin. Amah pawh a hnathawhna lama a contact vanga hawlh nawk nawk chang an nei ve ta fo mai. Kei lah chuti tho. Kan nin thin zia kha. Engemaw changin in lamah hna te kan han thawk chhunzawm leh thin a, nunphung pangngai taka hman a, thil tih thlip thlep kha a lo harsa ta..he hripui zet hi chu !Ni rei vakloah Covid vanga thi an rawm chho tan ta, a va manganthlak em!  Mihring tamna ngang a lo ni bawk nen Mumbai zet chu a darh chak ngang mai. Thenawm lawkah thihpui te an rawn awm chhoa, natna chi khat anga ngaih kha chu a harsa khawp mai. Erica hian min duatin min care viau mahse hun harsa leh khirh han tawn meuh chuan mahni inchhung lum ngei kha mitthlaah a lo langlo theilo. Khawiah pawh awm ila  Chhungkua, mahni in leh lo a pawimawh zia ka hriat nawn phah.  

Inkharkhip hunte an han siam chhoa in lamah hun tam zawk hman a lo ngai chhoa,  hlim dun viau mah ila  rilru chu thui tak a kal kuallo theilo. Kan hmalam hun atana beiseina kan lo neih tam tak dan rual lohin thiah sawmin a awm meka, harsa taka kan thawhchhuah kan himna tur ngaih pawimawh vangin in senral a lo ngai leh thina. Thil tam tak a ngaihtuah loh theih thinlo. Erica hian a mawhphurhna ah hian min ngai viau nain thil zawng zawngah ka ring thei bikloa, a mawi leh mawilo te ngaihtuah a ngai ve tho sia. Mizoram lama haw tura mizo thiante an han insiam sap sap thu hriat te phei kha chuan lung hi a leng duh angreng. Ka chhungte pawn min rawn chah ve deuh reng bawka. Hripui lenna kalsan chu duh viau mah ila Erica kalsan daih erawh harsa ka ti khawp mai. Erica pawn a phallo tih chu a hriat sawi lemlo mahse. Mahse ka chhungte thu chu a zah viau thung. Ngun takin kan sawi duna eng em kan tilo ang chu tiin awm rih chu ka duh taa. Ka chhungte bulah pawh kan him theih zel thu leh min lo tawngtaipui thin tura in chahin ka tum dan chu ka hrilh taa. Hetia hripui an zual hnu phei hi chuan Erica hian min duat zual khawp mai. Fimkhur takin theih ang angin mahni hnate thawk zawmin harsatna karah pawh hlim takin kum 2020 chu kan hmang liam tep tawh a. Christmas a lo hnai chhoa mizo rilruah chuan lunglenna a awmlo theilo, Rebeccai hla kan khua tih hla kha youtube ah hian ka ngaithla deuh reng zel Erica lah chuan awmzia hre lemloin phur zet hian alo lampui thina, ka lunglenna kha kan hlimpui letling phian. 2020 christmas a kan hlapui pakhat ve kha nia ka tan chuan a hlu ve tlat.

Hlim tak chuan kan hmang ve e

 

Kum te a lo thar leh ta, minawlpuiin kan tih tur pawimawhte kan ti leh tana kan buai chho leh dawn tihah a aia nasain chu hripui bawk chu a rawn comeback leh ta...a va hneawm zozai tak em. Ka chhungte mawlh hi an awm hle hle theilo, march thla tir atang khan haw turin min rawn nawr ngar ngar tawh a, hna laklawh neih bawk nen buaithlak ve khawp mai. Chung zawng zawng aia harsa chu Erica kalsan mawlh hi. Chhuanlam siamin ka la hnial lui zela eng tin tin emaw ka la tang ve hram hram ni berin ka hria. Kan unau hi nu leh pa thu awih ve thei tak kan nih avangin han hnial vak hi chuan rilru hi nuamlo duh khawp mai. Nu leh Pa lahin fate chu min ngaihtuah nasa mai sia. An rawn tih chhen pawh hi a awm tho mai. In hrang chang ka la ni miauloa.  Tiang boruak ah hi chuan nuih dun a har  duh tawh khawp mai.  In kalsan thei reng kan nih tawh avangin kan thusawi pawh a serious thei viau. Ka nuin Flight ticket vel a lo book fel thlap chu niin.April ni 3 a chhuak tur chuan loh theih lohin ka in buatsaih taa. Hlim taka awm luih hram hram kha kan tum duna, harsa mahse a ngai tlat sia. Kum khat chuang zet awmdun tawh hmun hla taka tiam chin pawh awmloa han in kalsan daih tur kha chu a har ve khawp mai. 

Ka haw dawn zan chuan thil tam tak kan sawi lemlo, eng nge kan hriat ni kan in be tlem khawp mai. Zan dar 12 velah kan mu taa. Zing ka tho chu balcony ah ni eng thlirin ka hawi kuala thil ngaihtuah neuh neuh pahin.  Dam tein kan awm anga kan inhmu leh vat mai ang, tunlaiah khawvel a zim tawh alawm ti rilruin ka inhnema, mahse tun dinhmunah chuan a zim ka ti mawlhlo. Erica chuan thil hi a lo ziak malh malha min rawn en pahin a nui leh sak thin a. Ka huphurh ber chu zing thawhhlima a nui hmel ka hmu tawhlo tu chu ni. Phurlo zet, ti lang siloin ka in siam mawlh mawlha, sakruangah lai tha hi a va zâmlo em! Kan inbuala Breakfast te kan ei zawh chuan chhuah mai kan tum taa, duhthawh taka inpawmin hun reilote chhinchhiah reng tur chu kan hmang liam ta. Airport lam pana kan tlan lai chuan Elvis a hla " I can't help falling in love with you" tih chu kan playa ka cry titih hi ni ber , a hrehawm khawp mai. Airport kan thlen chuan mi an lo tam angrenga han emotional viau kha a chiloh. Erica chuan lehkhabu min pek pahin a kara lehkha in thlep a zeh tel chu zanah i chhiar dawn nia a tia,  inkuahin kan inthlah taa. 

Tluang deuh chuan kan thlawka, kolkataah reilote kan chawla whatsapp textin Erica chu kan hrilh a kan chhuak leh taa. Kan thleng hla telh telha lung a leng telh telh mai.  Ka van ngai che em!  Aizawl pawh ka thleng tluang e. Ka positive lem loh avangin quarantine kha nimaia harsa tur a awm hranloa. Lung erawh a leng dawn khawp mai.  Ka pute inhnuai ber chu ka awmna turin an lo siam fel thlapa fimkhur takin keimahin ka in dahthlaa, chhungte pawh kum 3 hnua inhmuh pawn inralthlir bak a theih tlat loh, ka nu phei chu a tap tepin ka hria.Ka khawngawih khawp mai. An lo siam fel thlap thlap khawp mai . Ei tur emgemaw zat an lo dah bawk a, ka inti fel a ka inbual zawh chuan  thlang lam tukverhah dakin boruak thiang tak kara Mizoram tlangdung hun engemaw hmuh tawh loh han thlir kual chu a hahdam thlakin thla hi muang sawng sawng thei. Rilru engthawl leh lunglenna inbuk tawka awm chu thiam a har.Reiek tlang zawna ni tla tur sen ruih thlir pah chuan Erica chu ka vedio call a hemi tum hi chuan ka insum thei nanglo, ka ngai em a ni... Mittui ka dang thei nganglo min khawngaih khawp mai. Min fuih sauh sauha min hnem bawka, kuah vawng vawng phakah han awm se la aw...

Zanriah eitur te min lo pea ka ei zawh chuan tih tur vak awm nghallo phone en pahin chhungte kabe kuala kan hlim phian. Dar 9 velah chuan Erica lehkhabu min pek kara thil inzep kha ka hrechhuak zawka eng vak anih phei chu ka ring lemloa, ka bag a mi chu chu phawrh in mu chungin ka Han en a,

To,

   My Louis

 

This Morning, 

I woke up to a rush of warm inner sun.

 You were resting next to me, 

and  I could see gentle dreams on your face. 

I smiled , watching you, and thought: 

All things should be about love

I'm not a perfect man. 

But I do know love,

Because I'm in love with you 

If you hold my hand

I know that I can grow

And if you give me a single day

I know I can use it to build many years

And we will live in those years, like a strong house, fixing our memories to the walls.

What a thing love is, what a good thing..

Love you

From Eric

 

Ka tan hian i lo va hlu em tih pahin a lehkhathawn chu ka fawp vawng vawnga .Mihring tam tak piang tawh mahse nang ang hi chu an awmlo ang.

Erica damlo hian hma asawn hleitheiloa karkhat hnuah ICU  a dah ngai ngai khawpin a taksa a chauin Oxygen a la lut tawhlo chu niin. Ventilator nen an enkawl mek a. He thu ka hriat zan kha chuan Covid positive silo khan a symptom neih ang zawng zawng hi ka nei ve ni berin ka hria. A va mangan thlak tak em!  Tinge ka lo  kalsan che, ka thiam loh a ni min ngaidam rawh aw Eric. 

I want to be there besides you and to hold your hand as fullfilling your dreams,

I want to make you laugh when you're having a bad time....

Zah pawh dawnloin engkim min hriatpuitu Ka thianpa Jitena chu a theih ang anga ngaihven turin ka ngen taa, Thianpa ka lawm lutuk e karkhat chuang i lo buaipui tih ka hriaa. Pune atangin Erica tunah  hian a nauin a awmpui meka rilru hi a va hah thin em! A dinhmun a tha hlei theilo chu ni ber, kar 2 chuang ICU ah enkawl a ni tawh. Lo dam thuai ang che Eric, I love you..

Ka tana  i thatna leh min tihsak zawng zawng, hlimna min pek zawng zawngte hi la rulh let theih che ka va duh em! Chak takin lo lo awm ang che aw..

"Khua a tlai a, van a ngui a,

Kawl a thim a, ni a liam a,

Zan a lo thlen a, van a thian hian,

Lungrun, nang ka ngai thin che"

 

(Lo fimkhur la, hripui laka him turin i mawhphurhna hlen ang che)